Kva gjer du?

Kommunen oppmodar alle til å bekjempa landøyda i nærleiken av landbruksområder. Gå ut med søppelposar og hanskar og riv opp plantane med røtene. Det er viktig at røtene vert fjerna. Bruk hanskar. Legg plantane i søppelposar, knyt igjen og lever dei som restavfall. Ikkje legg dei i hageavfall eller kompost. Søppelposar og hanskar kan hentast ved resepsjonen på kommunehuset.

Kommunen kan henta

Kommunen kan òg henta inn det som vert samla inn. Send e-post til Thomas.Eide@eidfjord.kommune.no med bilete av plassering av søppelsekken om du ynskjer henting. Plantane må vera i søppelsekker som er lukka igjen. Kommunen vil ha innsamling fortløpande. 

Meir om Landøyda

Landøyda er ein naturleg vill plante i norsk natur. Det er eit fleirårig ugras som veks i beiter, langs veg og i grøftar, og som er enkel å kjenna igjen på sine gule blomar på ettersumaren. 

Landøyda er først og fremst eit problem i landbruket då den er giftig for storfe og hest. Forgiftinga er kronisk og oftast dødeleg («Sirasjuka»). Storfe og hest vrakar normalt planten på beitet, men forgifting kan førekoma. Landøyda bør difor fjernast frå åker og eng slik at den ikkje hamnar i tørrfôret til dyr. 

Landøyda har frø med fnokk som spreier seg lett med vinden, og etablerer seg i eng i nærleik av beite med mykje landøyda. Ein plante har i gjennomsnitt 2100 frø, men kan ha opp til 30 000 frø per plante. Ved større mengder landøyda i silo eller høy kan problemet med forgifting verta større enn på beite!