Gebyra skal reknast ut etter den forskrifta som gjeld den datoen kommunen tek imot ein fullstendig søknad eller rekvisisjon.

Den som får utført tenester som nemnt i denne forskrifta, skal betala gebyr i samsvar med satsane og retningslinene her. Gebyrkravet skal rettast mot tiltakshavaren, rekvirenten, forslagsstillaren, eller den som har bede om å få utført det aktuelle arbeidet. Dersom gebyret skal betalast av andre enn dei som er nemnt over, må dette stadfestast skriftleg av vedkomande som skal betala fakturaen.

Kommunen held seg til ein tiltakshavar/rekvirent/forslagsstillar, og vil senda ein faktura. Ved fleire tiltakshavarar, rekvirentar eller forslagsstillarar, vert desse rekna som solidarisk ansvarlege for gebyret.

Dersom tiltakshavar/rekvirent/forslagsstillar av ulike årsaker har betalt for mykje i gebyr, skal kommunen så snart tilhøvet er klarlagt, betala tilbake det beløpet som er betalt for mykje.

Det kan ikkje krevjast rentetillegg ved for mykje betalt gebyr.
 

• Gebyr skal betalast 14 dagar etter fakturadato.
• Klage på vedtak medfører ikkje utsett betalingsfrist.
• Klage på fastsetjinga at eit gebyr, eller avgjerd av søknad om heilt eller delvis fritak for gebyr, medfører ikkje utsett betalingsfrist.
   

Gebyr for ulike sakstypar vert fakturert som følgjer:

Plansaker

• Grunngebyret: Grunngebyret vert fakturert når vedtak om utlegging til offentleg høyring vert fatta.
• Oppstartsmøte og undervegsmøte: Gebyr for dette vert fakturert når møtet er gjennomført.
• Planprogram: Gebyr for dette vert fakturert når vedtak om å leggja forslaget ut til offentleg høyring vert fatta.
• Konsekvensutgreiing: Gebyr for dette vert fakturert når vedtak om å leggja forslaget ut til offentleg høyring vert fatta.
• Kommunal bistand til konsekvensutgreiing: Gebyr for dette vert fakturert når kommunen sitt arbeid er utført.
• Møte i regionalt planforum: Gebyr for dette vert fakturert når møtet er halde.

Byggjesaker

• Byggje- og delesaksgebyr vert fakturert når endeleg vedtak er fatta i saka. Løyve i byggje- og delesaker vert gjeve på vilkår av at gebyret er betalt innan fakturaen sin betalingsfrist jf. pbl § 21-4 (5) jf. § 33-1.
• I dei sakene der delesøknaden også inneheld rekvisisjon til oppmåling, kan delesaksgebyret og oppmålingsgebyret verta fakturert samstundes.
• Saker etter matrikkellova:
• Gebyret vert som hovudregel fakturert på forskott jf. matrikkelforskr. § 16 (5) jf. matrikkell. § 32. Først når gebyret er betalt vert saka lagt vidare til handsaming. Der storleiken på gebyret ikkje kan fastsetjast før etter gjennomført arbeid, skal det fakturerast 70 % av forventa gebyrsats. I dei sakene som skal fakturerast etter medgått tid, kan gebyret sendast ut etter at arbeidet er gjennomført.
• Tinglysingsgebyr og dokumentavgift vert innkravd samstundes med ovannemnde gebyr, med unntak av arealoverføringar, der dokumentavgifta er ukjent. I desse sakene vert dokumentavgifta sendt ut i eigen faktura etter tinglysing.

Seksjoneringssaker

• Seksjoneringsgebyr vert fakturert på forskott jf. eierseksjonsloven § 15. Først når seksjoneringsgebyret er betalt, vert saka handsama. Tinglysingsgebyr vert innkravd samstundes med seksjoneringsgebyret.

Konsesjonssaker

• Konsesjonsgebyr vert fakturert når vedtak er fatta.

Generelt for alle sakstypar

• Saker som vert trekte, returnerte eller avviste: Gebyr vert fakturert når saka vert avslutta utan realitetsvedtak dersom gebyr ikkje allereie er forskottsfakturert.
• For arbeid som skal betalast etter brukte timeverk, skal kommunen ved krav om førehandsbetaling stipulera gebyret.
• Ved store oppdrag kan kommunen skriva ut rekning på utførte delar av arbeidet, men ikkje oftare enn månadsvis.
   

Dersom eit gebyr er openbert urimeleg på grunn av saka sin art, mengd arbeid og kostnadane kommunen har hatt, kan rådmannen eller den som han gjev fullmakt, av eige tiltak fastsetja eit høveleg gebyr. Det same gjeld der eit gebyr vert sett på som openbert urimeleg av andre grunnar enn dei som er nemnde over.

Rådmannen eller den som han gjev fullmakt kan også setja ned gebyret der dei same føresetnadane som i avsnittet over ligg føre, og kommunen har motteke grunngjeven søknad om redusert gebyr frå den som har motteke krav om betaling.

Enkeltvedtak fatta i medhald av gebyrforskrifta kan påklagast. Fylkesmannen i Hordaland er klageinstans.

Det vert kravd gebyr tilsvarande 1 time for saker som vert returnerte som ikkje søknadspliktige, eller som av andre grunnar ikkje kan eller skal handsamast av kommunen.

Det vert kravd halvt gebyr for byggje-, dele- og dispensasjonssøknadar som vert trekte før vedtak er fatta.

Når ein tiltakshavar/forslagsstillar/rekvirent er årsak til at kommunen sitt arbeid vert avbrote og ikkje kan fullførast, kan tiltakshavar/forslagsstillar/rekvirent søkja om å få tilbakebetalt inntil 50 % av førehandsbetalt gebyr. Det same gjeld der det er søkt om rammeløyve etter byggjesaksreglane, men det ikkje vert søkt om igangsetjingsløyve innan rammeløyvet går ut.

Det vert kravd halvt grunngebyr for planforslag som vert trekt før saka er lagd ut til offentleg høyring. Det vert også kravd halvt grunngebyr når ei sak må verta avslutta som uaktuell som følgje av manglande oppfølging frå forslagsstillar.

Det vert kravd halvt gebyr for saker som fører til avslag. Ved fornya eller retta søknad, der denne vert godkjent, vert det kravd 70 % gebyr.

• Satsen for feltarbeid skal dekka alle eventuelle ekstrakostnadar med kost og transport.
• Satsane for timepris her gjeld kun for saker som gjeld myndigheitsoppgåver. Mva er ikkje del av desse satsane, og vert ikkje fakturert her.
• Der kommunen må engasjera sakkunnig hjelp til naudsynte utgreiings- og kontrolloppgåver som den ikkje kan handtera sjølv, skal kommunen varsla tiltakshavar i forkant og avtala pris for dette.